Душанбе. 19-уми феврал. ОИ «Азия-Плюс» – Бо қарори раиси шаҳри Душанбе Маҳмадсаид Убайдуллоев 21-уми феврал дар шаҳри Душанбе шанбегии нахустини умумишаҳрӣ доир гардида, дар чаҳорчӯбаи он ярмарка-фурӯши ниҳолҳо ва тухмии гул доир мегардад.
Тавре сухангӯи раиси шаҳр Шавкат Саидов ба ОИ «Азия-Плюс» хабар дод, чорабинии мазкур бо ташаббуси Сарраёсати ободонии ҳукумати шаҳри Душанбе баргузор мешавад. «Дар ярмарка маҳсулоти ташкилоту муассисаҳои шаҳр оид ба парвариши дарахтҳои сояафкан ва гулҳо ба фурӯш бароварда мешавад», – афзуд Ш.Саидов.
