Душанбе. 27-уми феврал. ОИ «Азия-Плюс» – Ояндаи наздик коршиносони ҶСК «Интер РАО ЕЭС» ҷиҳати шиносоӣ ва таҳлили дақиқи ҷузъиёти макони сохтмони се нерӯгоҳи хурд дар Тоҷикистон ба ҷумҳурии мо меоянд.
Тавре аз Вазорати энергетика ва саноати ҷумҳурӣ ба ОИ «Азия-Плюс» хабар доданд, қаблан мутахассисони ширкати русиягӣ бо макони сохтмони нерӯгоҳҳои хурди пешниҳодшуда дар рӯдхонаҳои Хингоб, Зарафшон ва Кофарниҳон шинос гардида буданд. «Дар ин боздид коршиносони Русия ҷузъиёти макони сохтмони нерӯгоҳ дар дарёи Зарафшонро мавриди санҷиши дақиқ қарор хоҳанд дод», – гуфт манбаъ.
Дар сафорати Русия дар Тоҷикистон иттилои ба Тоҷикистон ташриф овардани мутахассисони русиягиро тасдиқ карда, иброз доштанд, ки феълан мӯҳлатҳои сафар миёни ҷонибҳо мувофиқа мегардад.
