Душанбе. 12-уми март. ОИ «Азия-Плюс» – Дар вилояти Хатлон дар беш аз 53 дарсади заминҳои тибқи нақша пешбинишуда кишти баҳорӣ гузаронида шуд.
Тавре сухангӯи Вазорати кишоварзии ҷумҳурӣ Нарзулло Додобоев ба ОИ «Азия-Плюс» хабар дод, дар ноҳияҳои тобеи марказ аз нақшаи пешбинишудаи 29,6 ҳазор гектар, 6 ҳазор гектар ва дар вилояти Суғд аз 61,8 ҳазор гектари пешбинишуда беш аз 6 ҳазор гектар замин кишт шудаанд.
Ба гуфтаи Н.Додобоев, соли равон кишоварзони ҷумҳурӣ ният доранд, ки дар майдони беш аз 134 ҳазор гектар кишти зироати ғалладона гузаронанд ва то имрӯз дар 24,3 дарсади заминҳо киштукори баҳории зироати ғалладона
анҷом дода шудааст.
Ғайр аз ин, феълан ҷараёни ғизодиҳӣ дар заминҳои кишти тирамоҳӣ гузаронидашуда идома дорад. Аллакай аз 215 ҳазор заминҳои кишти тирамоҳӣ дар беш аз 100 ҳазор гектар ғизодиҳӣ анҷом дода шудааст.
