Душанбе. 5-уми июн. ОИ «Азия-Плюс» – Имрӯз дар шаҳри Душанбе бахшида ба Рӯзи байнулмилалии ҳифзи муҳити зист чорабинӣ доир мегардад. Чорабинӣ аз ҷониби раёсати шаҳрии ҳифзи муҳити зист созмон дода мешавад.
Тибқи иттилои хабарнигори ОИ «Азия-Плюс», дар назди театри лӯхтаки пойтахт намоишгоҳи корҳои намояндагони ташкилотҳои ғайриҳукуматӣ ва созмонҳои мактабҳо бахшида ба масоили экологӣ ташкил шудааст.
Интизор меравад, ки дар чорабинӣ мақомоти раҳбарии Кумитаи ҳифзи муҳити зисти назди ҳукумати ҶТ иштирок мекунанд. Дар фарҷоми чорабинӣ маросими бо тӯҳфаҳо қадрдонӣ намудани намояндагони фаъоли созмонҳои экологӣ баргузор мешавад.
