Президенти Русия Дмитрий Медведев ба Тоҷикистон ташриф овард.
Тавре аз Вазорати корҳои хориҷии ҷумҳурӣ иттилоъ доданд, имрӯз ӯ бо сарони кишварҳои Тоҷикистону Покистон ва Афғонистон дар нишасти «чаҳоргонаи Душанбе», ки дар қароргоҳи ҳукумати Тоҷикистон баргузор мешавад, ширкат хоҳад варзид.
Пас аз анҷоми кори нишасти мазкур сафари расмии президенти Русия ба Тоҷикистон оғоз мегардад. Нахуст гуфтушуниди як ба яки сарони кишварҳои Тоҷикистону Русия ва сипас мулоқоти ҳайати васеъи ҷонибҳо доир мегардад.
Дар ҷараёни сафари расмии президенти Русия ба Тоҷикистон имзои се санади ҳамкорӣ – Изҳороти муштараки сарони кишварҳо, Барномаи ҳамкории иқтисодии байни ҶТ ва РФ барои солҳои 2011 – 2014 ва Созишнома дар бораи ҳамкории марзӣ дар назар аст.
Президенти Русия ҳамчунин дар маҷлиси навбатии Шӯрои сарони давлатҳои Иттиҳоди Давлатҳои Мустақил, ки 3 сентябри соли 2011 дар шаҳри Душанбе баргузор мешавад, низ ширкат хоҳад варзид.
