Бар асари сӯхтор бозори марказии маркази маъмурии Вилояти Муҳтори Кӯҳистони Бадахшон – шаҳри Хоруғ қариб пурра нобуд гардид.
Тавре ба ОИ «Азия-Плюс» аз Вазорати корҳои дохилии ҷумҳурӣ хабар доданд, сӯхтор шаби 22-юми октябр дар қаламрави бозори марказии шаҳри Хоруғ сар задааст. «Оташ 1 ҳазору 300 метри мураббаъи қаламрави бозорро фаро гирифта, чаҳор ошхона, 18 нуқтаи савдо ва як маркази тиҷоратӣ пурра нобуд шудаанд», – гуфтанд дар ВКД.
Ба иттилои манбаъ, талафоти ҷонӣ ба қайд гирифта нашудааст. Бино ба маълумоти пешакӣ, хисороти моддӣ аз сӯхтор 800 ҳазор сомонӣ (беш аз 168 ҳазор доллари ИМА)-ро ташкил медиҳад. Сабабҳои сар задани сӯхтор муайян карда мешаванд.
