Душанбе. 24-уми июл. «Азия-Плюс» – Сандуқи лоиҳаҳои сармоягузории амалкунандаи Тоҷикистон аз 60 лоиҳа иборат буда, маблағи умумии онҳо 1,9 млрд. доллари ИМА-ро ташкил медиҳад, – гуфт зимни нишасти хабарӣ муовини раиси Кумитаи давлатии сармоягузорӣ ва идораи амволи давлатии Тоҷикистон Анвар Наҷмиддинов.
Ба гуфтаи ӯ, ин лоиҳаҳо аз 20 сарчашма маблағгузорӣ мешаванд. «Ин лоиҳаҳо асосан аз ҷониби Бонки осиёгии рушд, Бонки ҷаҳонӣ, Бонки исломии рушд ва ҳукумати Чин сармоягузорӣ мешаванд, – гуфт вай. – Ҳудуди 75%-и воситаҳои сандуқро қарзҳо, 3,7%-ашро бурсҳо ва 7,5%-ро саҳми ҳукумати Тоҷикистон, хоҷагӣ ва ҷамоатҳо ташкил медиҳанд».
Наҷмиддинов таъкид кард, ки тамоми воситахои сандуқ ба маблағгузории 12 бахши гуногуни иқтисоди Тоҷикистон равона гардидаанд. «Дар нимсолаи аввал аз ин воситаҳо 76,6 млн. доллари ИМА азхуд шудааст, ки аз нақшаи пешбинишуда ба андозаи 20,6% бештар аст», – гуфт ӯ.
Дар ҳамин ҳол, Наҷмиддинов иттилоъ дод, ки дар зарфи 6 моҳи соли равон ҳаҷми умумии сармоягузории ба ҷумҳурӣ воридшуда 134,5 млн. доллари ИМА-ро ташкил додааст, ки аз ин миқдор 74,1 млн. $ аз ҷониби корхонаву ташкилот ҷалб гардида, 60 млн. $ сармоягузориҳои мустақим мебошанд.
