Рӯзи якшанбеи ҳафтаи гузашта, 19-уми август, дар мавзеи наздики фурудгоҳи ҳарбии Айнӣ як ҳавопаймои Вазорати мудофиаи Тоҷикистон ба садама дучор шуд.
Рӯзи душанбеи ҳафтаи равон дар фурудгоҳи Айнӣ маросими видоъ бо халабонони фавтидаи ҳавопаймои Як-52 – афсарони Вазорати мудофиаи ҷумҳурӣ Суҳроб Бойпочоев ва Алексей Кошелев баргузор гардид.
Тавре ба ОИ «Азия-Плюс» сардори маркази матбуоти Вазорати мудорфиаи ҷумҳурӣ Фаридун Маҳмадалиев хабар дод, дар маросими видоъ намояндагони мақомоти раҳбарии Вазорати мудофиа, афсарони нерӯҳои низомии ҳавоии Тоҷикистон ва хешону наздикони афсарон ҳузур доштанд.
Ба гуфтаи манбаъ, ҳавопаймои мавриди садама қароргирифта ба Ҷамъияти мусоидат ба мудофиаи Тоҷикистон мутааллиқ буд.
Прокуратураи ҳарбӣ сабабҳои суқути ҳавопаймои мутааллиқ ба Ҷамъияти мусоидат ба мудофиаи Тоҷикистонро мавриди таҳқиқ қарор дода, бо ин мақсад комиссияи байниидоравӣ таъсис дода шудааст.
