Вазорати корҳои хориҷии Тоҷикистон иддаои номзад ба маснади президенти Эрон Оятуллоҳ Саид Муҳаммад Боқири Харрозӣ дар бораи ба ҳайати Эрон баргардонидани Тоҷикистон, Арманистон ва Озарбойҷон дар сурати сарвари давлат шуданашро маҳкум мекунад.
Дар изҳороти Раёсати иттилоот, матбуот, таҳлил ва тарҳрезии сиёсати хориҷии ВКХ Тоҷикистон дар ин робита зикр мегардад, ки изҳороти роҳбари ҳизби “Ансори Ҳизбуллоҳ”-и Эрон, ки яке аз пайвандони собиқ вазири корҳои хориҷии Ҷумҳурии Исломии Эрон мебошад, боиси тааҷҷуб ва таассуфи доираҳои гуногуни фарҳангӣ ва сиёсии аҳли ҷомеаи Тоҷикистон гашт. Баёнияи Оятуллоҳ Саид Муҳаммад Боқири Харрозӣ дар ин доираҳо ҳамчун баёнияи шахси моҷароҷӯ, хомхаёл, ноогоҳ ва бехабар аз асли қазия, вазъи воқеии имрӯзаи минтақа ва ҷаҳон ва низоми ҳуқуқи байналмилалӣ арзёбӣ гардид.
«Аҳли ҷомеаи Тоҷикистон дар саргармиҳои талошҳои пешазинтихоботӣ чунин иддаои “заминҷамъкунӣ” намудани яке аз номзадонро ба маснади Раиси Ҷумҳурии Исломии Эрон, ки хилофи воқеиятҳои асри XXI, ҳамла ба мафҳумҳои муқаддаси истиқлолу соҳибихтиёрӣ ва навъе мудохила ба умури дохилии кишвари соҳибихтиёр мебошад, қатъиян маҳкум менамояд», – омадааст дар изҳорот.
Дар изҳорот таъкид мегардад, ки Ҷумҳурии Исломии Эрон яке аз аввалин давлатҳоест, ки Ҷумҳурии Тоҷикистонро чун давлати соҳибихтиёр эътироф намуда, дар қаламрави он сафорати худро таъсис дода буд. Пас аз ин дар тӯли зиёда аз 20 сол Тоҷикистону Эрон дар асоси меъёрҳои амалкунандаи ҳуқуқи байналмилалӣ ва Оинномаи Созмони Милали Муттаҳид муносибатҳои байнидавлатиро ба роҳ монда, имрӯз равобити гуногунарсаи хешро пиёда менамоянд. Ҳамкориҳои гуногунпаҳлӯи Тоҷикистону Эрон, ки пас аз истиқрори сулҳ ва ризоияти миллӣ дар Тоҷикистон ба таври густурда оғоз гашта буданд, сол аз сол амиқтар, пурмазмунтар ва ғанитар мегарданд. Ва чунин ҳам бояд бошад, зеро ин сатҳ ва умқи мусаллами муносиботи халқҳои ба ҳам хешу табор аст.
Зимнан зикр шудааст, ки гузаштаи таърихӣ, пайвандҳои фарҳангӣ, забонӣ ва нажодии муштарак аз муҳимтарин хусусиятҳоянд, ки Тоҷикистонро бо Эрон дар як ҳавзаи фарҳангӣ ва тамаддунӣ қарор медиҳанд ва заминаи лозим барои ҳамгироии бештари ду кишвари соҳибихтиёр ва мустақилро бар асоси баробарҳуқуқӣ, адами мудохила ба умури дохилии якдигар, тамомияти арзӣ ва эҳтироми истиқлолияти давлатӣ фароҳам месозанд.
