Дар минтақаи шимоли кишвар аъзои нахусти ҷамъияти ифротгарои «Ҷундуллоҳ» («Ҷанговарони Аллоҳ» – гурӯҳи ҳарбии покистонӣ) ба муҳлатҳои зиёди зиндони низомаш пурзӯр маҳкум шуданд. Дар ин бора зимни нишасти хабарии имрӯза прокурори ноҳияи Суғд, генерал-майори адлия Шариф Қурбонов хабар дод.
Ӯ зикр кард, ки чанде қабл суди ноҳияи Ашт баррасии парвандаи ҷиноӣ нисбати ду нафар сокинони деҳаи Чигдаи ҷамоати Қирқудуқ Адҳам Абдуллоеви 27-сола ва Содиқ Туробови 20-соларо ба итмом расонид.
«Суд ин ҳардуро дар содир намудани ҷиноятҳо мутобиқи моддаҳои 187, қ. 2 (Ташкили иттиҳоди ҷиноятӣ), 307, дараҷ. 2, қ 2 (Ташкили иттиҳоди экстремистӣ (ифротгаро) ва 307, дараҷ. 3, қ. 2 (Иштирок дар иттиҳоди экстремистӣ) гунаҳкор эътироф намуда, Адҳам Абдуллоевро ба муҳлати 20 сол ва Содиқ Туробовро ба муҳлати 15 сол аз озодӣ маҳрум намуд», – иброз дошт номбурда.
Қурбонов таъкид дошт, ки аз ҷониби суд алоқамандии онҳо ба ҷамъияти ифротгарои «Ҷундуллоҳ» собит карда шудааст.
Ба қавли номбурда, зимни дар Русия қарор доштан, онҳо нахуст ба сафи Ҳаракати исломии Ӯзбекистон ва сипас ба сафи ҷамъияти ҷиноятпешаи «Ҷундуллоҳ пайвастаанд.
«Ҳангоми бозгашт ба ватан аввали соли равон онҳоро кормандони прокуратураи вилоят ва Раёсати ВКД дар вилояти Суғд боздошт намуда, муайян карда шудааст, ки онҳо ба таблиғи афкору мақсадҳои ин ҷамъияти ҷиноятпеша машғул будаанд. Гузашта аз ин, Абдуллоев дар Вазиристони Покистон таълим гирифтааст», – афзуд прокурори вилоят.
