Зимни хӯроки шоми сарони кишварҳои узви Гурӯҳи-20 маъруф бо номи G-20 дар Санкт-Петербург ихтилофи назари онҳо нисбати масъалаи ҳалли низоъи Сурия аён гардид ва дар ҳамин ҳол, шумори ҷонибдорону мухолифони амалҳои шитобкорона қариб баробар буд. Сухангӯи президенти Русия Дмитрий Песков дар ин хусус ба журналистон хабар дод.
«Бидуни назардошти муқаррароти мақомоти қонунии банулмилалӣ, чанде аз кишварҳо зарурати андешидани тадбирҳои шитобкоронаро ҷонибдорӣ намуда, як қатор кишварҳои дигар даъват ба амал оварданд, ки ба нақзи ҳуқуқи байнулмилалӣ набояд роҳ дода шавад ва ҳамчунин набояд фаромӯш сохт, ки танҳо Шӯрои амнияти СММ ба қабули қарор дар бораи истифодаи нерӯ ҳуқуқ дорад», – мнависад ИНТЕРФАКС бо такя ба гуфтаҳои Дмитрий Песков.
Ба иттилои хабаргузории РБК, нахуствазири Италия Энрико Летта дар микроблоги худ дар Twitter оид ба ин масъала чунин ибрози андеша намудааст: «Ҳоли ҳозир хӯроки шом ба итмом расида, он ихтилофи андешаҳо оид ба ҳалли буҳрони Сурияро тасдиқ намуд».
Ёдрас мекунем, ки дар шаҳри Санкт-Петербурги Русия нишасти сарони 20 кишвари пешрафтаи олам (G-20) ҷараён дорад. Дар нишаст Дабири кулли СММ Пан Ги Мун ва сафири махсуси СММ ва Лигаи кишварҳои араб оид ба Сурия Ахзар Иброҳимӣ низ ҳузур доранд.
Онҳо аз сарони кишварҳои Гурӯҳи G-20 даъват карданд, ки баҳри қатъи хунрезӣ дар Сурия тамоми кӯшишотро ба харҷ диҳанд. Дабири кулли СММ ба ҳозирин дар бораи ҷараёни тафтиши истифодаи аслиҳаи кимиёвӣ дар канораи шаҳри Димимшқ рӯзи 21-уми август аз ҷониби коршиносони СММ маълумот дод.
Таҳлили вазъи кунунӣ ва дурнамои рушди иқтисоди ҷаҳон, таъмини рушди пойдор, шаффофияти бонкӣ, азнавсозии низоми молӣ-арзии байнулмиллалӣ, ислоҳи муносибати молӣ, густариши пойдори бозорҳои ҷаҳонии энергетика, рушди ҳамкориҳои байнулмилалӣ, мубориза алайҳи фасод, таъсиси ҷойҳои нави корӣ, мубориза бо саркашӣ аз пардохти андоз ва ғайра аз ҷумлаи масоили маркази таваҷҷуҳи сарони кишварҳои G-20 унвон мешаванд.
Аъзои G 20-ро кишварҳои Аргентина, Австралия, Бразилия, Канада, Чин, Фаронса, Олмон, Ҳинд, Индонезия, Италия, Ҷопон, Кореяи Ҷанубӣ, Мексика, Русия, Арабистон, Африқои Ҷанубӣ, Туркия, Англия, ИМА ба илова Иттиҳоди Аврупо ташкил медиҳанд.
