Чор узви Ҳизби наҳзати исломии Тоҷикистонро, ки нимаи моҳи гузашта бо мақсади омӯзиши вазъ атрофи бахши маҳаллии ҳизб дар Вилояти Мухтори Кӯҳистон Бадахшон қарор доштанд, имрӯз, 7-уми сентябр ба Кумитаи давлатии амнияти миллӣ даъват карданд.
Тавре ба ОИ «Азия-Плюс» аз қароргоҳи ҲНИТ хабар доданд, ба онҳо ба номи Воҳидхони Қосиддин, Раҳматуллоҳи Раҷаб, Саодатшоҳ Адолатшоев ва Зарафо Раҳмонӣ даъватнома расидааст ва дар он сабабҳои даъват ба КДАМ зикр нагардидаанд.
Ёдрас мекунем, ки нимаи моҳи август зимни дар ВМКБ қарор доштан аъзои зикршудаи ҲНИТ дар роҳ аз Рӯшон ба самти Хоруғ мавриди таъқиб ва лату кӯб қарор гирифтанд. Он замон ҳизб тавассути сомонаи расмии худ дар ин робита изҳор намуда буд, ки рӯзи 13 август 5 узви ҳизб ҷиҳати расидагӣ ба вазъи мавҷуда атрофи бахши маҳалли ҳизб ба ВМКБ сафарбар гардиданд.
