– Воқеияти имрӯзи Тоҷикистон Иттиҳоди нерӯҳои ислоҳотхоҳи Тоҷикистон (ИНТИ)-ро водор намуд ба хулосае бирасанд, ки ҳуқуқшиноси маъруф ва ҳомии ҳуқуқ Ойниҳол Бобоназароваро ба номзадии мансаби президентӣ пешбарӣ кунанд, – гуфт дар мусоҳиба ба хабарнигори ОИ «Азия-Плюс» рӯҳонӣ ва сиёсатмадори маъруф Ҳоҷӣ Акбар Тӯраҷонзода.
«Имконоти Бобоназарова ба пирӯзӣ дар интихобот дар навбати аввал ба мардуми кишвар вобаста аст. Шарҳ медиҳам, агар мардуми Тоҷикистон воқеъан ҳам хостори тағйирот дар кишвар ва зиндагии худ бошанд, пас номзади мухолифонро дастгирӣ мекунанд. Ин ҷо муҳим он аст, ки то чӣ андоза худи номзад ва дастаи пешазинтихоботии ӯ мардумро ба барномаи худ эътиқодманд месозанд ва чӣ гуна ситоди Бобоназарова фаъолият хоҳад дошту худи ӯ чӣ тарз барномаву ҳадафҳояшро то мардум мерасонад», – зикр кард Тӯраҷонзода.
Дар идома ӯ изҳор кард, ки тибқи мувофиқаи пешакӣ, ҳамаи аъзои гурӯҳи корӣ оид ба таъсиси ИНИТ бояд ба сафи шахсони бовариноки номзади ягона аз мухолифин шомил шаванд. «Дар ин робита ман ҳамчун узви гурӯҳи кории мазкур омодаам, ки шахси бовариноки номзад ба мансаби президентӣ Ойниҳол Бобоназарова бошам», – афзуд Тӯраҷонзода.
