Гурӯҳи террористони ахири ҳафтаи гузашта дар шаҳри Душанбе боздоштшуда, роҳандозии таркишҳо дар назди чор дарвозаи пойтахт, як қатор биноҳои мақомоти корҳои дохилӣ, Кумитаи давлатии амнияти миллӣ ва дигар иншооти давлатиро тарҳрезӣ намуда буданд.
Тавре ба ОИ «Азия-Плюс» як манбаъи огаҳ аз сохторҳои қудратии ҷумҳурӣ хабар дод, гурӯҳро сокини ҷамоати Чоргултеппаи ноҳияи Рӯдакӣ Алимурод Маханови 29-сола бо лақаби «устод» роҳбарӣ мекардааст, ки дар яке аз лагерҳои ҷангиёни Ҳаракати исломии Ӯзбекистон дар Покистон таълими ҳарбӣ гирифтааст.
«Айни замон 10 нафар аз аъзои фаъоли гурӯҳи терроистии мазкур боздошт ва аз онҳо таппончаҳо, адабиёти таблиғотӣ, нақшаҳои иншоот барои тарконидан ва ғайра дарёфту мусодира гардида, ҷустуҷӯи чанде аз аъзои он эълон шуд», – гуфт манбаъ.
Бино ба иттилои сомонаи расмии ВКД ҶТ, имрӯз, 23-юми сентябри соли 2013, соати 21:00 ба воситаи Шабакаи аввали Телевизиони Тоҷикистон барномаи махсуси телевизионӣ, вобаста ба дастгиршавии гурӯҳи муташаккили мусаллаҳи террористӣ, ки тариқи пинҳонӣ дар шаҳри Душанбе фаъолият намуда, қасди содир намудани амали террористиро доштанд, намоиш дода мешавад.
Қаблан
иттилоъ дода будем, ки дар пойтахти кишвар мақомоти қудратӣ гурӯҳи террористонеро, ки анҷоми як силсила амалҳои террористиро тарҳрезӣ намуда буданд, безарар гардониданд.
