Салоҳиддин Камолов, бародари номзади пешбаришуда аз ҲНИТ ба мансаби президентӣ Ойниҳол Бобоназароваро рӯзи 29-уми сентябр ба шуъбаи милисаи ноҳияи Ёвон даъват карданд.
Тавре ба ОИ «Азия-Плюс» Абдуқаюми Қаюмзод, котиби матбуотии ситоди О.Бобоназарова хабар дод, кормандони шуъбаи милиса ин амали худро бо он маънидод кардаанд, ки Камолов шоҳиди кадом ҳодисае дар меҳмонхонаи Ёвон будааст, ки дар он ба ҳайси ошпаз кор мекунад.
«Бобоназарова ба Ёвон раҳсипор шуданӣ буд, вале бародараш тавассути телефон дар ин робита изҳор намуд, ки ӯро аллакай аз шуъбаи милиса ҷавоб дода, аз рӯи ҳодисае ба сифати шоҳид ӯро бозпурсӣ кардаанд. Ӯро нозири маҳаллии милиса ба шуъба даъват кардааст», – гуфт Қаюмзод.
Ба қавли ӯ, ин даъват як шакли фишороварӣ ба худи Бобоназарова аст, зеро бародарашро бидуни даъватиномаи расмӣ ва дар рӯзи истироҳат ба бозпурсӣ даъват кардаанд. Каморлов дар ноҳияи Ёвон ба гурӯҳи ташаббускори О.Бобоназарова дар ҷамъоварии имзоҳо ба ҷонибдории ӯ кӯмак мерасонад.
