Дар изҳороти интишоршудаи ситоди пешазинтихоботии номзади аз ҲНИТ пешбаришуда Ойниҳол Бобоназарова ҳукуматдорон барои истифодаи «бесобиқа»-и захоири маъмурӣ мавриди интиқод қарор дода шуданд.
«Вазъи торафт бадшавандаи пешазинтихоботӣ, ки вобаста ба он ҳуқуқҳои интихоботии шаҳрвандон дағалона ва ба таври оммавӣ вайрон мешаванд, боиси ташвишу нигаронии ҷиддист», – гуфта мешавад дар изҳорот.
Дар изҳорот бори дигар зикр мегардад, ки раванди устувори маҳдудкунии ҳарчи бештари ҳуқуқҳои конститутсионии қариб 1,5 миллион ҳамватанони бурунмарзӣ барои ширкат дар интихоботи Президенти Ҷумҳурии Тоҷикистон, ки беш аз 35 %-и теъдоди умумии интихобкунандагонро ташкил медиҳанд, мушоҳида мешавад.
«Иқдоми навбатии бағоят нигаронкунандаи КМИР ҶТ, ки таҳти салоҳияти Президенти мамлакат ба фаъолият мепардозад, қарор аз хусуси ташкили участкаҳои интихоботӣ дар хориҷа аст, ки теъдоди нокифояашон, бахусус дар Федератсияи Россия (ҳамагӣ 24), беш аз як миллион ҳамватанони моро аз овоздиҳи маҳрум месозад», – баён мегардад дар изҳорот.
Ин ҷо аз сиёсати роҳандозишудаи ҳукумат нисбати ҲНИТ низ изҳори норозигӣ карда мешавад. «Ба замони пешбарии номзадҳо ба мансаби президентӣ рост омадани маъракаи бузургмиқёси бадномкунии ҲНИТ ва аъзои он беҳуда нест. Ин як қисмате аз ҳамон нақшаи роҳ надодани номзади мухолифин ба интихобот тариқи монеъа эҷод кардан ба ҷамъоварии шумори зарурии имзоҳо ба ҷонибдории ӯст», – чунин мешуморанд дар ситоди Бобоназарова.
Санаи интихоботи президентӣ дар Тоҷикистон ба рӯзи 6-уми ноябр таъин шудааст. То имрӯз шаш ҳизби сиёсӣ ва ҳамчунин Иттифоқи ҷавонони Тоҷикистон ва Федератсияи иттифоқҳои касабаи мустақили Тоҷикистон номзадҳои худ ба мансаби президентиро пешбарӣ намуданд. Аз ҲКТ Исмоил Талбаков, аз Иттифоқи ҷавонон ва Итифоқҳои касабаи Тоҷикистон президенти амалкунанда Эмомалӣ Раҳмон, аз Ҳизби ислоҳоти иқтисодӣ раиси ҳизб Олимҷон Бобоев, аз Ҳизби сотсиалистӣ раиси он Абдуҳалим Ғаффоров, аз Ҳизби аграрӣ академик Толиббек Бухориев, аз Ҳизби демократ раиси он Саидҷаъфар Исмонов ва аз Ҳизби наҳзати исломии Тоҷикистон Ойниҳол Бобоназарова номзад ба мансаби президентӣ дар интихоботи қарибулвуқӯъ пешбарӣ шуданд.
