– Самаранокии кори ҳукумати нави Тоҷикистонро пас аз гузашти як вақти муайяне, масалан ним ё як сол метавон арёбӣ намуд, – бар ин назар аст муовини аввали раиси ҲКТ, вакили парлумон Исмоил Талбаков.
«Ман ҳамчун номзад ба мансаби президентӣ дар барномаи пешазинтихоботиам зикр карда будам, ки дар сурати пирӯзӣ 60%-и ҳайати ҳукуматро нав мекунам ва Эмомалӣ Раҳмон низ тақрибан ба ҳамин миқдор ҳайати дастаашро нав кард», – гуфт Талбаков.
Дар робита ба масъалаи аз ҷониби парлумон тасдиқ шудани ҳайати нави ҳукумат, вакили парлумон зикр кард, ки ҷиҳати омӯзиши ҳамаҷонибаи чанде аз аъзои ҳукумат ба вакилон вақт зарур аст.
Қобили зикр аст, ки то имрӯз таъсиси Ҳукумати нави Ҷумҳурии Тоҷикистон дар ҳайати Сарвазир, Муовини якум ва се муовини Сарвазир, 14 вазир ва се раиси кумитаи давлатӣ дар маҷмӯъ 22 нафар анҷом ёфт. 13 нафар аз аъзои Ҳукумат ё худ 60 фоизи он иваз карда шуд. Синни миёнаи аъзои Ҳукумати нави ҷумҳурӣ 52 сол аст. Синни миёнаи ҳайати Ҳукумати қаблӣ бошад, 56,7 сол буд.
Ҳамаи аъзои Ҳукумати нави кишвар тахассуси олии касбӣ доранд. Аз онҳо 3 нафар доктори илм ва 7 нафар номзади илм мебошанд. Дар ҳайати пешин танҳо 1 нафар доктори илм ва 7 нафар номзади илм буд. Дар ҳайати нави Ҳукумат 2 нафар зан мебошанд. Қаблан танҳо як нафар бону дар Ҳукумати кишвар фаъолият дошт.
