Бахшида ба савгандёдкунии донишандӯзони Донишкадаи ҳарбии Вазорати мудофиа бо иштироки масъулини Вазорати мудофиа ҷамъомади бошукӯҳ доир гардид.
Бино ба иттилои маркази матбуоти Вазорати мудофиаи ҶТ, дар рӯҳияи баланди эҳтиром нисбат ба халқу ватан ва ҳамагуна арзишҳои милливу давлатӣ боз наздик ба 300 нафар курсантони курси якуми Донишкадаи ҳарбии Вазорати мудофиа савганди садоқатро ба забон оварданд.
Ба иттилои манбаъ, дар ҷараёни чорабинӣ, ба муносибати 23-юмин солгарди Истиқлолияти давлатии кишвар чанде аз афсарони Донишкадаи мазкур бо рутбаҳои навбатии ҳарбӣ сарфароз гардонида шуданд.
Зимнан зикр мегардад, ки дар анҷоми чорабинӣ аз ҷониби курсантони донишкадаи мазкур задухӯрдҳои тан ба тан бо усулҳои шарқӣ ва расми гузашти низомии донишҷӯёни ҷавон дар назди минбар намоиш дода шуд.
