Чанде қабл дар мақомоти иҷроияи маҳаллии ҳокимияти давлатӣ дар шаҳри Душанбе таҳти раёсати Маҳмадсаид Убайдуллоев ҷаласаи кории шаҳрдорӣ баргузор шуд.
Бино ба иттилои хадамоти матбуоти мақомоти шаҳрдории пойтахт, дар ҷаласа масоили марбут ба омодагӣ ба истиқболи тантанаҳои марбут ба ҷашни 90-солагии мақоми пойтахтро доро гардидани шаҳри Душанбе мавриди баррасӣ қарор гирифтанд.
Ба иттилои манбаъ, Маҳмадсаид Убайдуллоев бо инобати мубрамияти масъала, ки пазиройии ҷашн 11 октябри соли равон тариқи роҳандозии маъракаи ободонии дастаҷамъонаи ҳар як сокини шаҳр аз хонаву дар, ҳавливу кӯча, шаҳраку маҳалла, гулгашту боғҳо таҳти шиори «Мо метавонем!» оғоз мегардад, бо мақсади ҳадафманд баргузор намудани ин чорабинии умумишаҳрӣ ба масъулини шаҳрдорӣ ва раисони ноҳияҳо дастур фармуд, ки нақшаи фарогирии тамоми марзи шаҳри Душанберо бо корҳои ободонӣ таҳия намуда, сафарбаршавандагони маъракаро дар ҷойҳо бо олотҳои меҳнат ва техникаҳои зарурӣ таъмин созанд.
Гуфта мешавад, раиси пойтахт ҳамчунин дастур дод, ки барои то ҷашн тибқи технологияҳои муҷассаманигаҳдорӣ ба ифоқа овардани намои тамоми ҳайкалу муҷассамаҳои дар шаҳр мавҷудбуда чораҳои амалӣ андешида шаванд.
«Идома бар он аз ҷониби раиси шаҳр ба тақвими чорабиниҳои дар партави ҷашнвора баргузориашон тарҳрезишуда тағйирот ворид карда шуда, мутобиқ ба он бо дарназардошти бо иштироки бевоситаи губернатори шаҳри Санкт-Петербург ҷаноби Полтавченко Г.С. пешбинӣ гардидани баргузории Рӯзҳои Санкт-Петербург дар шаҳри Душанбе, санаи ин чорабинӣ 7-8 ноябри соли 2014 муқаррар гардид», – омадааст дар хабари мақомоти шаҳрдории пойтахт.
