Нимаи дуюми имрӯз, 27 январ маҳфили коршиносони Осиёи Марказӣ «Рушди авруосиёӣ» дар шаҳри Душанбе дар мавзӯи «Суҳроб Шарипов дар ҳаёти зеҳнӣ ва сиёсииТоҷикистони муосир» мизи гирд барпо мекунад.
Аз маҳфили коршиносони Осиёи Марказӣ «Рушди авруосиёӣ» ба «Азия-Плюс» дар ин робита иттилоъ доданд, ки ба чорабинии мазкур кормандони сохторҳои давлатӣ, коршиносони масоили сиёсӣ ва намояндагони ВАО даъват карда шудаанд.
Ёдрас мекунем, ки санаи 20 январ яке аз арбобони сиёсии саршиноси Тоҷикистони муосир, вакили палатаи поёнии парлумони ҷумҳурӣ, собиқ директори Маркази тадқиқоти стратегии назди президенти ҶТ Суҳроб Шарипов аз олам даргузашт.
«Тӯли ҳаёти пурмаҳсул зимни фаъолият ҳам бо сохторҳои давлативу ҳам ғайридавлатӣ ва ҳамчунин ташкилотҳои байнулмилалӣ Суҳроб Шарипов аз худ мероси ғаниву бузурги зеҳнӣ ва сиёсӣ боқӣ гузошт. Иштирокдорони чорабинӣ моҳияту нақши ин мерос барои имрӯз ва дурнамои Тоҷикистону минтақаи Осиёи Марказиро мавриди таҳлилу баррасӣ қарор медиҳанд», – гуфт манбаъ.
