Раиси Маҷлиси миллии Маҷлиси Олии ҶТ Маҳмадсаид Убайдуллоев дар бораи санаи 5-уми март дар шаҳри Душанбе даъват шудани иҷлосияи охирини 21-уми палатаи болоии парлумон даъвати ҳозира қарор ба имзо расонид.
Ёвари раиси палатаи болоии парлумон Шавкат Саидов ба «Азия-Плюс» дар ин робита иттилоъ дод, ки дар иҷлосияи охирин қонунҳои қаблан аз ҷониби палатаи поёнии парлумон қабулшуда «Дар бораи фаъолияти илмӣ ва сиёсати давлатии илмӣ-техникӣ», «Дар бораи ҳифзи ҳуқуқи кӯдак», «Дар бораи адвокатура ва фаъолияти адвокатӣ», «Дар бораи арбитражи байнулмилалии тиҷоратӣ» ва «Дар бораи нафт ва газ» баррасӣ мешаванд.
Зимнан зикр гардид, ки дар иҷлосияи мазкур ҳамчунин баррасии як қатор масоили марбут ба вазъи иҷтимоиву иқтисодӣ ва фарҳангии кишвар низ дар назар аст.
