Бунёди сармоягузории аврупоии "CFC s.r.o” барои рушди ширкати ҳавопаймоии “Шоҳин Эйрлайнз", ки соли гузашта дар Тоҷикистон таъсис ёфт, беш аз 200 миллион доллар сармоягузорӣ мекунад. Созишнома барои дарёфти ин пулро рӯзи 10-уми март Зафар Аҳмадзода, директори кулли ин ширкат ва Гунтарс Селиковс, муассиси Бунёди мазкур имзо кардаанд.
Ин ширкат хабар додааст, ки ин маблағ дар давоми 5 сол ҷудо шуда, барои васеъ кардани ангар, беҳтар кардани кори ширкат ва мустаҳкам кардани инфрасохтори он истифода мешавад.
"Имзои созишномаи сармоягузорӣ бо Бунёди сармоягузории аврупоӣ марҳалаи муҳим дар рушди ширкати ҳавопаймоии “Шоҳин Эйрлайнз” мебошад. Ҷалби сармояи дарозмуддат ба суратбахшии тавсеаи парки ҳавопаймоӣ ва шабакаи парвозҳо, ҳамчунин саҳмгузорӣ дар рушди устувори авиатсияи граждании Ҷумҳурии Тоҷикистон мусоидат менамояд", – гуфтааст Зафар Аҳмадзода.
Гунтарс Селиковс зикр кардааст, ки музокирот бо “Шоҳин Эйрлайнз” беш аз 6 моҳ ҷараён дошт ва дар ин муддат дар Дубай (АМА) ва дигар шаҳрҳои Аврупо якчанд вохӯриҳои корӣ баргузор шудааст, ки “бароямон имкони омӯзиши муфассали бизнес–модели ширкат, арзёбии сатҳи касбии ҳайати идоракунанда ва доираи имкониятҳои бозорро фароҳам овард”.
“Шоҳин Эйрлайнз” – ширкати ҳавопаймоии хусусӣ буда, ба иттилои масъулонаш, соли гузашта дар кишвар сабти ном шуда, дар Фурудгоҳи байналмилалии Душанбе ангари худро дорад. Тибқи иттилои расмӣ, ҳоло он хидматрасонии фармоиши чархболро пешниҳод мекунад ва дар оянда мехоҳад ҳавопаймои “L-410 NG”-ро ба ангари худ ворид кунад.
Бояд гуфт дар Тоҷикистон ду ширкати ҳавопаймоии “Сомон Эйр” ва “Тоҷик Эйр” фаъолият мекунанд, ки дар фурудгоҳ ангари ҳавопаймоии худро доранд. Ҳоло танҳо ширкати ҳавопаймоии “Сомон Эйр” тавассути шаш ҳавопаймои “Boeing 737 Next-Generation” аз Тоҷикистон ба 25 самти Аврупо, Осиё ва Ховари Миёна парвоз мекунанд.
Ширкати миллии “Тоҷик Эйр” бошад аз соли 2019 инҷониб бо сабаби мушкилоти молӣ дар сатҳи байналмилалӣ парвоз анҷом намедиҳад. Ҳоло ширкат парвозҳои дохилиро оғоз кардааст ва нақша дорад, ки парвозҳои байналмилалиро ҳам аз сар гирад.
