То анҷоми имрӯз кӯчаву хиёбонҳои шаҳру навоҳӣ ва маҳаллаҳои аҳолинишини кишвар, нуқтаҳои савдо ва воситаҳои нақлиёт бояд аз маводи таблиғотии аёнии аҳзоби сиёсӣ, номзадҳо ба вакилӣ дар палатаи поёнии парлумон ва маҷлисҳои маҳаллӣ тоза карда шаванд.
Роҳбари дастгоҳи КМИР Тоҷикистон Аббдуманнон Додозода дар ин робита иттилоъ дод, ки чун интихобот ба санаи 1-уми март таъин шудааст, мутобиқи меъёрҳои қонунгузорӣ, маъракаи таблиғотии аҳзоби сиёсӣ ва номзадҳо ба вакилӣ, вохӯриҳои онҳо бо интихобкунандагон бояд рӯзи 27 феврали соли 2015 ба итмом расонида шаванд.
«Бар асоси меъёрҳои қонунгузории интихоботии Тоҷикистон, санаи 28 феврал, як рӯз қабл аз интихобот дар ҷумҳурӣ Рӯзи хомӯшӣ эълон карда мешавад ва дар ин рӯз ба ҳама гуна таблиғ, аз ҷумла мавҷуд будани шиору овезаҳои аёнӣ низ иҷозат дода намешавад» – қайд кард Додозода.
Номбурда таъкид дошт, ки назорати гирифтани лавҳаву шиор ва дигар маводи таблиғотӣ аз кӯчаву хиёбон ва дигар нуқтаҳо ба зиммаи масъулони қитъаҳои интихоботии маҳаллӣ ва ҳамчунин комиссияҳои интихоботии ҳавзавӣ вогузор шудааст.
