Идораҳои шабакаҳои барқи шаҳрҳои Хуҷанд ва Чкаловски вилояти Суғд як иқдоми хайрияи муштаракро роҳандозӣ намуда, маросими хатнатӯйи дастаҷамъонаи 13 нафар аз оилаҳои камбизоатро баргузор карданд.
Корманди идораи шабакаҳои барқи шаҳри Хуҷанд Шоира Хоҷаева ба «Азия-Плюс» дар ин робита иттилоъ дод, ки аз ин шумор 11 нафарашон фарзандони кормандони шабакаҳои барқи Хуҷанди Чкловск буда, 2 нафар кӯдакон аз оилаҳои камбизоати шаҳри Хуҷанд мебошанд.
Ба қавли Ш.Хоҷаева, ба ин муносибат энергетикҳо дар тарабхонаи «Истироҳат» барои кӯдакон ва волидону наздикони онҳо дастурхони идона ороста, ин чорабинии хайрро пуршукӯҳ баргузор намуданд.
Сардори идораи Шабакаҳои барқи шаҳри Хуҷанд Набиҷон Иброҳимзода ҳозиронро бо тӯйи суннатиашон табрик гуфта, ба кӯдакон дучархаи кӯдакона, тӯҳфаҳои хотиравӣ, либосу дигар лавозимоти кӯдакона тақдим намуд.
Қобили зикр аст, ки аз оғози сол бо мусоидату дастгирии ҳукумати шаҳри Хуҷанд корхонаву ташкилотҳо маросими хатнатӯйи 76 нафар кӯдакон аз оилаҳои камбизоати шаҳрро баргузор карданд.
