Дар натиҷаи гузаронидани амалиёти махсус аз рӯи усули «таҳвили назоратшаванда» аз тарафи кормандони Агентии назорати маводи нашъаовари назди Президенти ҶТ ва Хадамоти давлатии назорати маводи нашъаовари назди ҳукумати Ҷумҳурии Қирғизистон дар шаҳри Бишкек се зан – шаҳрвандони Қирғизистон ва Тоҷикистон дастгир гардиданд, ки аз онҳо 8 кг маводи нашъаовари сахтаъсири героин ёфт ва мусодира гардид.
Бино ба иттилои шуъбаи робита бо ҷомеаи АНМН ҶТ, дар натиҷаи гузаронидани амалҳои минбаъдаи тафтишотӣ-оперативӣ дар шаҳри Исфара дар хонаи яке аз дастгиршудагон бо истифода аз саги хизматӣ дар махфигоҳ зиёда аз 1 кг героин дарёфт ва мусодира гардид.
Қайд мешавад, ки ду нафар аз занони дастгиршуда қаблан барои даст доштан ба муомилоти ғайриқонунии маводи нашъаовар суд шуда, айни ҳол тафтишот минбаъд нияти ба куҷо интиқол додани героинро муайян намуда истодааст.
Зимнан зикр мегардад, ки амалиёт бо иштироки бевоситаи афсари алоқаи Агентӣ, ки зиёда аз ним сол дар шаҳри Оши Қирғизистон фаъолият менамояд, амалӣ гардидааст.
