Шаби 22 ба 23 апрели соли равон боз 8 нафар пизишкон – шаҳрвандони Точикистон тавассути тайёраи харбии Русия Аз Яман ба Маскав оварда шуданд.
Тавре намояндаи расмии сафоратхонаи ҶТ дар Русия Муҳаммад Эгамзод хабар дод, бинобар муроҷиати дигарбораи шаҳрвандони боқимондаи кишвар дар ин кишвари ноамн, сафири Тоҷикистон дар Русия Имомуддин Сатторов ба масъулини ситод дастур додааст, ки роҳҳои ҳалли ин қазияро низ пайдо намуда, ба ҳамватанони ниёзманд кумак расонанд.
Ахиран узви ситоди назди сафорат Парвиз Содиқов тавассути телефон бо масъулини сафорати Русия дар Яман дар тамос шуда, масъалаи расондани кумак ба ҳамватанонро хоҳиш намудааст. Ӯ ҳамчунин мустақиман бо сарнишини ҳавопаймои ҳарбии русӣ низ дар тамос шуда, дархост намуд, ки чанд тан аз шаҳрвандони тоҷики интизори наҷот аз ин макони ноамнро ба Маскав баргардонанд.
Зикр гардид, ки масъулини Ситоди назди сафорат аз ҳисоби дипломатҳо ва намояндагии Хадамоти муҳоҷират шаҳрвандони тоҷикро дар фурудгоҳ истиқбол ва баробари расидани ин шаҳрвандон, онҳоро ҳуҷҷатгузорӣ намуда, ба Ватан гусел хоҳанд кард.
