Рӯзҳои истироҳати гузашта дар иншооти мансуб ба оилаи раиси Ҳизби наҳзати исломии Тоҷикистон Муҳиддин Кабирӣ ва дигар хешовандони ӯ дар Душанбе кофтуковҳо гузаронида шуданд. Дар ин бора ба «Азия-Плюс» хешу ақрабои Кабирӣ хабар доданд.
Ба қавли онҳо, кофтуков ва барӯйхатгирии амволи оила Кабирӣ аз ҷониби комиссияе гузаронида шудааст, ки ба ҳайати он кормандони Прокуратураи генералӣ ва Агентии мубориза бо коррупсия шомл будаанд. Хешону наздикони Кабирӣ дар бораи бо кадом асос гузаронидани ин амалҳо посухи саҳеҳе дастрас накардаанд.
Онҳо гуфтанд, кофтуковҳо дар коргоҳи истеҳсоли коғази ташноб ва дастпоккунҳо (салфеткаҳо)-и мутааллиқ ба яке аз хешони Кабирӣ, дар ширкати сохтмонии мансуб ба яке аз бародарони раиси ҲНИТ, дафтари кории маркази «Диалог» дар километри 7-ум ва дигар иншооти мутааллиқ ба хешону наздикони Кабирӣ гузаронида шудаанд.
«Хамаи ҳуҷҷатҳо ва техникаи дафтари корӣ мусодира шуд. Ҳамчунин онҳо гуфтанд, ки тамоми техникаи истеҳсолиро низ мусодира мекунанд, вале чун он насб шудаву мустаҳкам аст, берун бурда натавонистанд. Дарҳои ҳамаи иншоот муҳр зада шуд», – ҳикоят карданд наздикони раиси ҲНИТ.
Қаблан рӯзи ҷумъа дар манзили шахсии Муҳиддин Кабирӣ воқеъ дар маҳаллаи Пивзавод, ки чанде пештар дар он баъди муҳр зада шудани дафтари кории марказии ҲНИТ нишасти хабарии Шӯрои сиёсии ҲНИТ доир гардида буд, низ кофтуков гузаронида шуд. Ин хона ба номи писари Кабирӣ ба қайд гирифта шудааст. Ҳуҷҷати хонаҳо, манзилҳои писарони Кабирӣ ва хешовандони наздики ӯ низ мусодира ва хонаҳо муҳр зада шудаанд.
Дар ҳамин ҳол, ба «Азия-Плюс» муяссар нашуд, ки аз Прокуратураи генералӣ ва Агентии зиддифасод дар ин бора маълумот дастрас намояд. Дар Агентии зиддифасод изҳор доштанд, ки имрӯзҳо ҳама ба корҳои тадорукоти ташкили нишасти СААД дар Душанбе машғуланд.
Ёдрас мекунем, ки ҳафтаи гузашта дар сомонаи АМИТ «Ховар» бо имзои шахсе бо номи Пӯлод Ғаффоров
мақолае ба нашр расид
, ки дар он ӯ Муҳиддин Кабириро ба робита доштанаш бо генерали фирорӣ Абдуҳалим Назарзода муттаҳам мекунад.
