Имрӯз бо иштироки вазири корҳои дохилӣ генерал-лейтенанти милитсия Раҳимзода Рамазон Ҳамро, раиси вилояти Хатлон Гулмаҳмадзода Давлатшо Қурбоналӣ ва ҳайати шахсии Раёсати Вазорати корҳои дохилии вилоят бинои нави маъмурии назди РВКД дар вилояти Хатлон ба истифода дода шуд.
Бино ба иттилои маркази матбуоти ВКД Тоҷикистон,
нахуст вазир ва раиси вилоят дар назди муҷассамаи Поси хотири онҳое, ки ба савганди худ содиқ буданд, гулчанбар гузошта, хотираи шаҳидони ҳангоми адои хизмат фавтидаро пос доштанд.
Сипас Рамазон Раҳимзода дар саҳни бино бо ҳайати шахсии РВКД дар вилояти Хатлон хамсӯҳбат шуда, зикр кард, ки бо дастгирию ғамхориҳои Сарвари давлат ва ҳукумати кишвар шароитҳои хизматии кормандони мақомоти корҳои дохилӣ сол аз сол беҳтар гардида истодаанд.
Гуфта мешавад, ин бинои нави иловагӣ, ки аз се ошёна иборат буда, бо тамоми таҷҳизоти замонавӣ муҷаҳҳаз гардидааст, барои пешбурди хизмат ва боз ҳам беҳтар гардонидани шароити хизматии кормандони милитсия мусоидат менамояд.
