Нимаи ҳафтаи равон зимни вохӯрии раҳбарияти Вазорати нақлиёти Тоҷикистон бо намояндагони Бонки осиёгии рушд (БОР) дурнамои ҳамкориҳои дуҷониба дар бахши нақлиёт баррасӣ шуданд.
Бино ба маълумоти Вазорати нақлиёти ҶТ, дар мулоқот ҷонибҳо масоили марбут ба кӯмаки техникӣ ба дастгирии иқтидор барои рушди шарикии давлат ва бахши хусусӣ дар Тоҷикистонро мавриди баррасӣ қарор доданд.
Қобили зикр аст, ки БОР яке аз ташкилотҳои асосии мададрасон ба Тоҷикистон маҳсуб ёфта, то имрӯз ҳаҷми маблағҳои ҷудошудаи ин ниҳод ба Тоҷикистон ба сифати қарзҳои имтиёзнок, грант ва кумакҳои техникӣ тақрибан 1,3 млрд. доллари ИМА-ро ташкил медиҳад.
Аз соли 2008 бо назардошти хатари ноустувории қарзи беруна, БОР ба Тоҷикистон танҳо бар асоси бебозгашт кумак мекунад.
Соли 2015 БОР ҳаҷми кумаки худ ба Тоҷикистонро наздики 20 млн. доллари ИМА зиёд карда, барномаи кумаки солонаи нақшавиро то 79 млн. доллари ИМА афзуд. Барномаи кумаки соли 2015 ба дастгирии рушди бахши хусусӣ, беҳбуди вазъ дар роҳҳои оҳан, истифодаи захираҳои обӣ ва ҳамчунин беҳтар кардани муҳити сармоягузорӣ равона шудааст.
