Вазорати корҳои дохилии Тоҷикистон хабар медиҳад, ки шахсоне, ки ихтиёран аз аъзогии Ҳизби наҳзати исломии Тоҷикистон баромадаанд ва баъди манъ доштани фаъолияти ҳизб ҳамкориро бо он қатъ намудаанд, тибқи қонунгузории Ҷумҳурии Тоҷикистон дар кирдори онҳо таркиби ҷиноят дида намешавад ва онҳо ба ҷавобгарӣ кашида намешаванд.
Дар сомонаи расмии ВКД Тоҷикистон дар ин робита қайд мешавад, ки вақтҳои охир шаҳрвандон ба мақомоти корҳои дохилӣ бо чунин савол муроҷиат карда истодаанд: Баъди бо ҳалномаи Суди Олии Ҷумҳурии Тоҷикистон Ҳизби наҳзати исломии Тоҷикистон ташкилоти ифротгарою (экстремистӣ)-террористӣ эътироф шуданаш оё собиқ аъзоёни ин ҳизб ба ҷавобгарии ҷиноятӣ кашида мешаванд?
Гуфта мешавад, танҳо шахсоне, ки фаъолияти худро дар ин ҳизб давом медиҳанд, ё аз нав аъзои он мешаванд ва ё сохторҳои нави ҳизбро ташкил карданӣ мешаванд, тибқи қонунгузории Ҷумҳурии Тоҷикистон ба ҷавобарии ҷиноятӣ кашида мешаванд.
Зимнан зикр мегардад, ки шахсоне, ки бо худ ҳуҷҷатҳои тасдиқкунандаи аъзои ин ҳизбро доранд, метавонанд ин ҳуҷҷатҳоро ба сохторҳои вилоятию шаҳру ноҳиявии Вазорати адлия ва ҳифзи ҳуқуқ оварда бо пешниҳоди ариза супоранд.
