Кормандони Раёсати минтақавии гумрукӣ дар вилояти Суғд пеши роҳи воридот ва паҳн гардидани маводҳои пиротехникиро ошкор ва пешгирӣ намуданд.
Бино ба иттилои дафтари матбуоти Хадамоти гумруки назди ҳукумати ҶТ, зимни як амалиёт дар роҳи мошингарди самти Конибодом – Хуҷанд воситаи нақлиёти тамғаи «Опел-Зафира» таҳти идораи шаҳрванд Мансуров Зафар, истиқоматкунандаи шаҳри Хуҷанд барои муоинаи гумрукӣ боздошт ва аз бордони автомашина дар дохили 48 адад қуттиҳои калони картонӣ бо навиштаҷоти «Трения», «Чёрная смерт», ва «Цай ванн лэй» ба миқдори умумии 23 ҳазору 944 дона маводи тарфгарӣ дарёфт карда шудааст.
Гуфта мешавад, ин миқдор маводи тарфгарӣ ба шаҳрванд Усмонов Икромбек, истиқоматкунандаи шаҳри Хуҷанд тааллуқ дошта, онро аз як нафар шаҳрванди Қирғизистон дар ҳудуди деҳаи Аркаи ин кишвар ба ҷои қарзаш гирифта, дар шаҳри Хуҷанд фурӯхтанӣ будааст.
Ба иттилои манбаъ, мутобиқи ташхиси лабораторӣ маводҳои пиротехникии аз шаҳрванди номбурда гирифташуда аз моддаҳои таркандаи хатарнок (порох) сохта шуда, барои ҳаёт ва саломатии инсон хеле хатарнок ва зараровар мебошанд.
Зимнан зикр мегардад, ки аз рӯи ҳолати мазкур нисбат ба шаҳрванд Усмонов Икромбек парвандаи ҷиноятӣ бо моддаи 199 пр-1 қисми 2-и КҶ Ҷумҳурии Тоҷикистон оғоз карда шуда, аз рӯи тобеияти тафтишотӣ ба Прокуратураи вилояти Суғд фиристода шудааст.
