Дар кӯчаи Аҳмади Дониши шаҳри Душанбе кормандони милиса автомашинаи тамғаи “Тайота-Ланд-Крузер”, таҳти идораи ронанда, марди 37-солаи сокини шаҳри Хоруғро боздошт намуданд.
Бино ба иттилои маркази матбуоти ВКД Тоҷикистон, зимни азназаргузаронии автомашинаи мазкур аз дохили борхалтаи варзишии мусофир, ҷавони 19-сола, донишҷӯи бахши 3-юми Донишгоҳи геологияи шаҳри Хоруғ, 10 килою 710 грамм маводи нашъадори навъи ҳашиш дарёфт ва мусодира карда шудааст.
Гуфта мешавад, дар назди маркази савдои “Мардон”, воқеъ дар кӯчаи Борбади шаҳри Душанбе низ ҳангоми азназаргузаронии автомашинаи шахсиии тамғаи “Мерседес-Бенс, мутааллиқ ба марди 42-солаи сокини ноҳияи Рӯдакӣ аз дохили борхалтааш 990 грамм маводи нашъадори навъи афюн дарёфт ва мусодира гардида, инчунин ҳангоми азназаргузаронии хонаи хоҳараш зани 40-солаи сокини ноҳияи Рӯдакӣ аз дохили амборхонааш 22 киллою 680 грамм маводи нашъадори навъи афюн дарёфт ва мусодира карда шудааст.
Зимнан зикр мегардад, ки нисбати далелҳои мазкур парвандаи ҷиноятӣ оғоз гардида, тафтишот дар ин самт идома дорад.
