Вазири корҳои дохилӣ генерал-лейтенанти милитсия Раҳимзода Рамазон Ҳамро бо Сафири навтаъиншудаи Фавқулодда ва мухтори Ҷумҳурии Туркия дар Тоҷикистон ҷаноби Аҳмад Осим Арар вохӯрӣ доир намуд.
Бино ба иттилои маркази матбуоти ВКД Тоҷикистон. зимни вохӯрӣ Вазири корҳои дохилӣ Рамазон Раҳимзода ҷаноби Аҳмад Осим Арарро ба муносибати Сафири Фавқулодда ва мухтори Ҷумҳурии Туркия дар Тоҷикистон таъин шуданаш табрик намуда, дар иҷрои вазифаҳои пурмасъул муваффақиятҳо таманно кард.
Дар ҷараёни мулоқот ҷонибҳо оид ба масоили мубориза бар зидди ҷиноятҳои фаромиллӣ аз қабили терроризм, экстремизм ва гардиши ғайриқонунии маводи мухаддир табодули афкор намуданд.
Зикр гардид, ки ҳамкориҳои васеъи дуҷониба дар доираи Созишнома оид ба ҳамкориҳои ҳуқуқӣ вобаста ба парвандаҳои шаҳрвандӣ, тиҷоратӣ ва ҷиноӣ аз 6-уми майи соли 1996 амалӣ карда мешаванд.
Ҳамкориҳои ду вазорат дар асоси Созишномаи байни Ҷумҳурии Тоҷикистон ва Ҷумҳурии Туркия оид ба ҳамкорӣ дар мубориза бо терроризми байналмилалӣ, гардиши ғайриқонунии маводи мухаддир ва моддаҳои психотропӣ ва ҷиноятҳои муташаккил аз 7-уми ноябри соли 2011, рӯз аз рӯз тақвият ёфта истодаанд.
Сафири Фавқулодда ва мухтори Ҷумҳурии Туркия дар Тоҷикистон ҷаноби Аҳмад Осим Арар изҳор дошт, ки робита ва ҳамкориҳо бо Вазорати корҳои дохилии Ҷумҳурии Тоҷикистон зич ба роҳ монда шуда, дар самти пешгирӣ ва ошкор намудани ҷиноятҳои фаромиллӣ дар ҳамбастагӣ ва якҷоягӣ мубориза бурда мешавад.
Дар хотимаи мулоқот изҳори умедворӣ карда шуд, ки ҳамкориҳои мутақобилан судманд дар самтҳои муҳим боз ҳам густариш хоҳанд ёфт.
