Минбаъд мақомоти ҳифзи ҳуқуқи Тоҷикистон эҳтимол ба хабардор кардани наздикону хешовандони шахсоне, ки ба гумони содир кардани ин ё он ҷиноят боздошт шудаанд, уҳдадор карда шаванд.
Ҳукумати ҷумҳурӣ пешниҳод кардааст, ки ба қонун «Дар бораи тартиб ва шароити дар ҳабс нигоҳ доштани гумонбаршуда, айбдоршаванда ва судшаванда» чунин тағйироту иловаҳои дахлдор ворид карда шавад.
Вакили палатаи поёнии парлумони Тоҷикистон, муовини раиси Кумита оид ба қонунгузорӣ ва ҳуқуқи инсон Мавлуда Қаландарзода ба «Азия-Плюс» дар ин робита иттилоъ дод, ки дар тағйироту иловаҳо уҳдадории мақомоти интизомӣ доир ба дар санад (протокол) сабт намудани ному насаби корманди мақомот, ки шахси гумонбарро бохздошт кардааст, пешбинӣ шудааст.
«Ғайр аз ин, дар санади боздошт ҳатман бояд дар бораи ба кадом хешу наздики шахси боздоштшуда хабар додан дар ин хусус ва кадом вақт сурат гирифтани он қайд гузошта шавад», – иброз дошт вакили парлумон.
Зимнан таъкид гардид, ки тағйироту иловаҳои пешниҳодшуда ба ҳимояи ҳуқуқи шахсони гумонбар ба содир кардани ин ё он ҷиноят ва ҳамчунин баланд бардоштани сатҳи масъулияти кормандони мақомоти интизомӣ, ки боздошт бо сабабҳои гуногун аз ҷониби онҳо сурат мегирад, нигаронида шудааст.
