Дар Қасри Маҷлиси намояндагони мардумии шаҳри Пекин 17 майи соли 2016 маросими супоридани Эътимодномаҳои сафири Тоҷикистон Парвиз Давлатзода ба Раиси Ҷумҳурии Мардумии Чин Си Тзсинпин баргузор гардид.
Бино ба иттилои Вазорати корҳои хориҷии ҷумҳурӣ, Раиси Ҷумҳурии Мардумии Чин Си Тзсинпин Эътимодномаҳоро қабул намуда, П.Давлатзодаро ба муносибати оғози расмии рисолати дипломатиаш ба ҳайси Сафири Фавқулодда ва Мухтори Ҷумҳурии Тоҷикистон дар Чин табрик намуда, ба ӯ баҳри иҷрои фаъолияти пурсамар ҷихати густариши муносибатҳои дӯстонаи Точикистону Чин комёбиҳо таманно намуд. Сарвари давлати Чин таъкид намуд, ки Тоҷикистон ва Чин ҳамсояҳои нек ҳастанд ва байни ду кишвар ҳамкории судманд ба роҳ монда шудааст.
Дар навбати худ, П.Давлатзода паёми гарми Президенти Тоҷикистон Э.Раҳмонро бо таманниёти нек ва шукуфоӣ ба мардуми дӯсти Чин расонд ва вусъат ёфтани муносибатҳои байнидавлатӣ баъд аз сафари давлатии сарвари давлати Чин ба Тоҷикистонро таъкид кард.
П.Давлатзода қайд кард, ки Тоҷикистон ба густариши муносибатҳои ҳамсоягиии накӯ, дӯстона ва ҳамкории судманд бо Чин аҳамияти хосса дода, муносибот бо Чин дар сиёсати хориҷии кишвараш мақоми афзалиятнок дорад. Бо назардошти сатҳи баланди эътимоди сиёсӣ, дӯстии устувор ва муносибатҳои шарикии Тоҷикистону Чин, рушди муназзами робитаҳои сиёсӣ, иқтисодӣ ва гуманитарӣ нақши намоён доранд.
Аз рушди бонизом ва натиҷаи ҳамгироии ду кишвар дар соҳаи амният, афзоиши ҳаҷми гардиши савдои хориҷӣ, густариши ҳамкориҳо дар татбиқи як қатор тарҳҳои бузурги аҳамияти минтақавӣ дошта, изҳори қаноатмандӣ карда шуд. Аҳамияти ташаббуси шоистаи Сарвари давлати Чин доир ба эҷоди “Камарбанди иқтисодии роҳи Абрешим” ҷихати тақвияти минбаъдаи ҳамкориҳои иқтисодии ду кишвар таъкид карда шуд.
П.Давлатзода иброз намуд, ки барои рушд ва тавсеаи босамари муносибатҳои дуҷониба миёни кишварҳои ҳамсоя ва мардумони дӯст тамоми кӯшишҳоро ба харҷ хоҳад дод.
