Мақомоти ҳифзи ҳуқуқи Душанбе хона ба хона гашта, реҷаи шиносномавиро месанҷанд ва маълумот дар бораи сокинони дар пойтахт иқоматдоштаро ба қайд мегиранд.
Бино ба маълумоти Вазорати корҳои дохилии ҷумҳурӣ, ин чорабинӣ мувофиқи нақша гузаронида шуда, ба ошкор кардани шаҳрвандоне, ки ғайриқонунӣ дар пойтахт иқомат доранд, нигаронида шудааст.
Бархе аз нозирони минтақавӣ ин чорабиниро чунин шарҳ медиҳанд, ки санҷиши мазкур дар робита ба ҷашни қарибулвуқӯи 25-умин солгарди Истиқлолияти давлатии Тоҷикистон сурат гирифта истодааст.
Ба гуфтаи онҳо, ин чорабинӣ мутобиқи дастури раҳбарияти Вазорати корҳои дохилӣ амалӣ мешавад.
Ёдрас мекунем, ки дар робита ба ҷашни 25-умин солгарди Истиқлолияти давлатӣ аз аввали моҳи август сохторҳои қудратии Тоҷикистон ба реҷаи пурзӯри адои хизмат гузаронида шуданд.
