Сарраёсати иҷрои ҷазо (СИҶ)-и Вазорати адлияи Тоҷикистон маълумот доир ба гӯё мавриди шиканҷа қарор гирифтани муовини раиси Ҳизби фаъолияташ дар қаламрави Тоҷикистон манъшудаи наҳзати исломӣ Маҳмадалии Ҳайит дар боздоштгоҳи тафтишотӣ (СИЗО)-ро рад кард.
Илҳом Маҳмудов, муовини сардори Сарраёсати мазкур ба «Азия-Плюс» дар ин робита изҳор намуд, ки ҳамаи ин овозаҳо асоси воқеӣ надоранд. «Ман ҳайронам, ки аз куҷо шумо ин овозаҳоро мегиред? Маҳмадалии Ҳайит оид ба вазъи солимиаш ҳеҷ мушкилие надорад, ӯ мавриди шиканҷа қарор нагирифтааст ва агар наздикону пайвандони ӯ расман дар ин хусус муроҷиат намоянд, мо ин овозаҳоро тафтиш мекунем», – гуфт ӯ.
Дар ҳамин ҳол, Савринисо Ҷӯраева, ҳамсари М.Ҳайит ба «Азия-Плюс» дар мавриди ин масъала хабар дод, ки ӯ ҳам аз ВАО дар ин бора огаҳӣ пайдо намуда, бо мақсади рӯшанӣ андохтан ба он ба СИҶ муроҷиат кардааст. «Аммо ба ман гуфтанд, ки барои вохӯрӣ бо ҳамсарам иҷозати Суди олии ҷумҳурӣ лозим аст ва айни замон ман дар Суди олӣ қарор дошта, посухи онҳоро интизорам», – гуфт тариқи телефон Савринисо.
Қобили зикр аст, ки дар шабакаҳои иҷтимоӣ ва чанде аз ВАО дар бораи мавриди шиканҷа қарор гирифтани М.Ҳайит ва бад шудании вазъи сиҳатии ӯ маълумот интишор шуда буд.
Ёдрас мекунем, ки
аввали моҳи июни соли равон
Суди олии Тоҷикистон муовинони раиси Ҳизби фаъолияташ мамнӯъи наҳзати исломии Тоҷикистон Саидумар Ҳусайнӣ ва Маҳмадалии Ҳайитро ба ҳабси абад ва 11 нафар боқимонда аъзои онро ба 14 то 28 соли зиндон маҳкум кард. Ягона зан миёни судшавандагон – ҳуқуқшиноси ҳизб Зарафо Раҳмонӣ ба 2 соли зиндон маҳкум шуд.
