Президенти Тоҷикистон Эмомалӣ Раҳмон рӯзи шанбе, 3 сентябр ба Ӯзбекистон сафар мекунад. Дар ин бора манбаъҳо аз доираҳои дипломатии ҷумҳурӣ ба «Азия-Плюс» хабар доданд.
Бино ба иттилои манбаъ, Эмомалӣ Раҳмонро дар ин сафар як ҳайати начандон бузурги расмӣ аз Тоҷикистон ҳамроҳӣ мекунад.
Қаблан иттилоъ дода будем, ки президенти Қазоқистон Нурсултон Назарбоев барномаи сафараш ба Чинро ихтисор карда, ба Ӯзбекистон раҳсипор мешавад. Дар ин бора ВАО-и Қазоқистон бо истинод ба Reuters хабар медиҳанд.
Нахуствазири Қирғизистон Сооронбой Жээнбеков ҳайати ин кишварро зимни сафар ба Ӯзбекистон роҳбарӣ мекунад. Ин хабарро манобеи худии агентии иттилоотии «Кабар» дар дастгоҳи ҳукумати Қирғизистон тасдиқ кардаанд.
Қаблан се манбаи дипломатӣ ба агентии Reuters доир ба марги Ислом Каримов иттилоъ доданд.
Девони вазирони Ӯзбекистон иттилоъ дода буд, ки вазъи солимии президенти Ӯзбекистон Ислом Каримов ниҳоят бад шудааст. Васоити ахбори умум ҳамчунин хабар дода буданд, ки дар зодгоҳи президенти Ӯзбекистон Ислом Каримов ба маросими дафни ӯ ҳамаҷониба корҳои омодагӣ ҷараён доранд, аммо мақомоти расмии Ӯзбекистон то ҳанӯз дар бораи вазъи солимии Ислом Каримов маълумот надодаанд.
