Дар роҳ аз Бишкек ба Ню-Йорк рӯзи 19 сентябр вазъи солимии президенти Қирғизистон Алмазбек Атамбоев каме бад шуда, дар ин робита сафари ӯ ба ИМА ҷиҳати иштирок дар кори иҷлосияи 71-уми Маҷмаъи умумии СММ мавқуф гузошта шуд.
Бино ба иттилои АКИpress, ҳайати Қирғизистон таҳти сарварии Алмазбек Атамбоев баъди нишаст дар фурудгоҳи ба номи Отатурки Туркия ба сафар идома доданӣ буд, вале Атамбоев аз дард дар қафаси синааш шикоят карда, баъди муоина табибон ба ӯ тавсия медиҳанд, ки дар Туркия таҳти назорати духтурон бимонад. Баъдан президенти дастур додааст, ки ҳайати Қирғизистонро дар кори иҷлосияи 71-уми Маҷмаъи умумии СММ дар Ню-Йорк вазири корҳои хориҷии ин кишвар Эрлан Абдилдаев роҳбарӣ кунад.
Роҳбари дастгоҳи президенти Қирғизистон Фарида Ниёзова имрӯз ба АКИpress иттилоъ додааст, ки вазъи солимии Алмазбек Атамбоев қаноатбахш буда, субҳи имрӯз президент тариқи телефон ба ӯ якчанд дастур додааст.
Қобили зикр аст, ки чанд рӯз қабл президенти Қирғизистон ҷашни 60-солагиашро таҷлил намуд. Хабаргузории «24.kg» итилоъ дода буд, ки зиёфати зодрӯзи президент бо ҳузури ҳудуди 200 нафар меҳмонон, ки миёнашон ситораҳои эстрадаи Русия Филипп Киркоров ва гурӯҳи A’Studio, ҳамчунин ҳунармандони маъруфи кишвар Гулҷигит Қалиқов, Гулзат Рисқулова ва дигарон ҳузур доштанд, дар қароргоҳи №1-иҳукумат баргузор шудааст.
Дар ҷашни 60-солагии президенти Қирғизистон ҳамчунин собиқ роҳбари Хадамоти федералии гумруки Русия Андрей Белянинов, афроди сарватманд Мӯсо Бажаев, Алиҷон Иброҳимов ва Александ Машкевич низ меҳмон будаанд.
Қаблан, санаи 16 сентябр Алмазбек Атамбоев дар Бишкек сарони кишварҳои узви ИДМ-ро қабул карда буд. Ба муносибати 60-солагиаш президенти Русия Владимир Путин ба Алмазбек Атамбоев ордени Алесканд Нескийро тақдим кард.
