Имрӯз дар Душанбе миёни сафорати Русия ва намояндагии Хазинаи кӯдакони СММ (ЮНИСЕФ) дар Тоҷикистон дар бораи шарикии сесола созишнома ба имзо расид, ки мутобиқи он ҳукумати Русия баҳри беҳбудии солимии кӯдакони тоҷик 1,43 млн. доллари ИМА маблағ ҷудо мекунад.
Дар маросими имзои лоиҳа, ки дар бинои Донишгоҳи славянии Русияву Тоҷикистон доир гардид, муовини аввали вазири тандурустӣ ва ҳифзи иҷтимоии аҳолии Тоҷикистон Саида Умарзода изҳор дошт, ки ин тадбир бахусус ба коҳиши мизони беморӣ ва марги барвақтии кӯдакон мусоидат мекунад.
«Амалисозии лоиҳа ҳамчунин пешниҳоди хизматгузориҳо дар мавриди барвақттар дарёфт ва дахолат кардан ба бемориҳои кӯдакони имконияташон маҳдуд ва аз рушд қафомондаро таъмин мекунад», – иброз дошт номбурда.
Тибқи ҳисобу китоби пешакӣ, дар доираи татбиқи лоиҳа ҳудуди 40 ҳазор нафар тифлон, кӯдакони хурдсол, оила ва хонаводаҳои онҳо имкон пайдо мекунанд, ки ҳар соле муддати ин се сол аз хизматгузориҳои беҳтари тиббӣ нисбати солимии модарону кӯдакон ҳам дар муассисаҳои тиббӣ ва ҳам дар шароити нигоҳубини хона истифода кунанд.
Сафири Русия дар Тоҷикистон Игор Лякин-Фролов қайд кард, ки ҳадафи аслии татбиқи лоиҳа тавсеъаи дастрасии модарони тифлони навзод ва кӯдакони хурдсол ба хизматгузориҳои заминавии тандурустӣ дар 12 ноҳияи ҷумҳурӣ аст.
«Бовар дорам, ки маблағгузорӣ ба лоиҳаи мазкур аз ҷониби Русия саҳми амалӣ дар коҳиши сатҳи маргумири кӯдакон дар Тоҷикистон хоҳад буд», – гуфт сафир.
