Палатаи поёнии парлумони ҷумҳурӣ имрӯз ворид намудани тағйироту иловаҳо ба Кодекси иҷрои ҷазои ҷиноятии Тоҷикистонро маъқул шуморид, ки мутобиқи он акнун қарорҳо барои рухсатиҳо ба маҳкумшудагон ва ивази реҷаи ҷазо дар мувофиқа бо мақомоти прокуратура қабул карда мешаванд.
– Барои рафтори намунавӣ ба маҳкумшудагон дар Тоҷикистон танҳо дар мувофиқа бо прокурор рухсатиҳои кутоҳмуҳлат дода мешавад, – гуфт зимни ҷаласаи парлумон муовини прокурори генералии ҷумҳурӣ Муҳаммад Осимзода.
Ин тадбир танҳо нисбати як гурӯҳи ҷудогонаи шахсони махқумшуда истифода мегардад. Қаблан маҳкумшудагон ба ҷазои зиндони низомаш шадид ва умумӣ дар вақти рухсатии ҳамасола бо қарори маъмурияти муассисаи ислоҳӣ қаламрави зиндонро тарк карда метавонистанд.
Ҳамчунин мутобиқи тағйироту иловаҳои қабулшуда, ивази реҷаи зиндон нисбатан ба реҷаи сабуктар низ дар мувофиқа бо мақомоти прокуратура сурат мегирад.
Ғайр аз ин, акнун бо қарори прокурори вилоят ё шаҳри Душанбе шахсоне, ки ҳукм нисбаташон мавриди амал қарор гирифтааст, дар сурати зарурат ба муҳлати то 4 моҳ дар боздоштгоҳи муваққатӣ нигаҳдорӣ шуда метавонанд.
То ворид шудани ин тағйирот маҳкумшудагон на дертар аз 10 рӯз аз замони ба унвони маъмурияти боздоштгоҳи муваққатӣ ворид шудани огоҳинома дар бораи мавриди амал қарор гирифтани ҷазо ба муассисаи ислоҳӣ равона мешуданд.
