Тоҷикистон дар қатори 103 кишвари саросари дунё узви Иттифоқи байнулмилалии алоқа буда, соли 2006 уҳдадор шудааст, ки то соли 2015 пурра ба пахши рақамӣ гузарад, аммо дар ин муҳлат аз иҷрои уҳдадорӣ набаромад.
Амалисозии тадбирҳои гузаштан ба пахши рақамӣ ба дӯши корхонаи давлатии ҶСК «Телерадиоком» вогузор шуда, то 17 июни соли 2015 ҳамаи шабакаҳо бояд ба ин тарзи пахши барномаҳо мегузаштанд.
Бино ба маълумоти «Телерадиоком», айни замон 6 шабакаи давлатии телевизион бо пахши рақамӣ ва 6 шабакаи телевизиони хориҷӣ («Арена ТВ», «Наука 2.0», Animal Planets, Euronews, «Карусел» ва Discovery) бо реҷаи тестӣ (озмоишӣ) барнома пахш намуда, «ТВ Кӯлоб», «ТВ Хатлон», «ТВ Суғд» ва «ТВ Бадахшон» низ ба номгӯи таҷҳизот (мултиплекс)-и минтақавии пахши рақамӣ дохил шудаанд.
Ду шабакаи телевизиони мустақили вилояти Суғд – СМ1 ва ТРК «Азия» низ дар реҷаи озмоишӣ ба мултиплекс дохил шуда, аммо баъдан бинобар сабаби талаб шудани арзиши баланд барои пахш дар мултиплекс – 32 сомонӣ барои 1 соат маҷбур шуданд, ки аз он хориҷ шаванд.
Ба гуфтаи Шаҳло Акобирова, роҳбари ТҒД «Хома», узви гурӯҳи кории Кумитаи телевизиону радио дар ин самт, ҳолате ба вуҷуд омадааст, ки шабакаҳои телевизиони мустақили Тоҷикистонро ба пахши рақамӣ бепул роҳ надода, вале шабакаҳои тиҷоратии хориҷиро иҷоза медиҳанд…
– Аз ин бармеояд, ки ҳозир мо минтақаи фарогирии шабакаҳои телевизиони хориҷиро васеъ карда, барои шабакаҳои худамон нархҳоеро муқаррар менамоем, ки шабакаҳои мустақили телевизион ба пардохти арзиши хизматгузориҳои «Телерадиоком» қодир нестанд, – мегӯяд ӯ.
Номбурда зикр кард, ки Тоҷикистон бояд ба гузариш ба пахши рақамӣ манфиатдор бошад, то ки ба аҳолӣ на аз пойгоҳҳои хориҷӣ, балки аз сарчашмаҳои муътамад маълумот дастрас шавад.
Маълумоти муфассал доир ба сабабҳои пурра ва саривақт нагузаштани Тоҷикистон ба пахши рақамӣ ва оқибатҳои он, маблағи пешбинишудаи хароҷот ба он ва дигар ҷузъиёти марбут ба ин масъаларо аз шумораи имрӯз интишоршудаи газетаи «Азия-Плюс» дарёфт карда метавонед, ки аллакай дар фурӯш аст.
