Рӯзҳои 19-20 октябр дар Душанбе Машварати шашуми вазирони маорифи давлатҳои аъзои Созмони ҳамкории Шанхай доир гардид.
Бино ба маълумоти сомонаи расмии СҲШ иштирокдорони машварат атрофи рушду таҷдиди низомҳои миллии маорифи кишварҳо ва самтҳои афзалиятноки ҳамкорӣ дар ин соҳа табодули назар намуда, лоиҳаи Созишномаи байниҳукуматии кишварҳои узви Созмон оид ба таъсис ва фаъолияти Донишгоҳи СҲШ-ро баррасӣ карданд.
Иштирокчиёни машварат қайд карданд, ки амалисозии лоиҳаи таъсиси Донишгоҳи СҲШ ба наздикшавии низомҳои милии таҳсилоти олии кишварҳо, таъмини ҳамгиройии захираҳои таълимӣ ва боз гардидани паҳноҳои нав барои густариши ҳамкориҳо имкон фароҳам месозад.
Зикр гардид, ки ҳуҷҷатҳои таъсиси Донишгоҳи СҲШ дар сатҳи макотиби олии шомили донишгоҳ ва вазоратҳои маорифи кишварҳо расман мувофиқа шуда, дар марҳилаи баъдӣ имзои қарордодҳо дар сатҳи ҳукуматҳо зарур аст.
