Бозори «Шоҳмансур», ки миёни мардуми пойтахт бештар бо номи бозори «Зелёний» маъруф аст, субҳи имрӯз баста шуда, савдогарони назди дарвозаи бозор гирдомада боз кардани онро талаб карданд.
Ба қавли яке аз савдогарони бозор, онҳо ҳар моҳ маблағи иҷораву андозро пардохт карда, аз сабаби баста шудани бозор огаҳӣ надоранд. «Ҳеҷ касе аз кормандони маъмурияти бозор то ҳол ба мо масъаларо шарҳ надодааст», – гуфт яке аз фурӯшандагон.
Муовини директори бозори «Шоҳмансур» Машраб Қараев ба «Азия-Плюс» дар шарҳи сабаби он изҳор намуд, ки Раёсати давлатии хадамоти оташнишонии пойтахт дар бораи қатъи фаъолияти бозор ба як муҳлати муайян, яъне «то бартараф кардани камбудиҳо дар риояи қоидаҳои зидди сӯхтор» қарор содир кардааст.
«Аз субҳ дар бозор комиссияе фаъолият дорад, ки анҷоми корҳои зарурӣ дар ин самтро арзёбӣ мекунад. Ҳамаи овозаҳои ба маркази савдои «Пойтахт-90» кӯчонидани соҳибкорони бозор асоси воқеӣ надоранд», – изҳор дошт Қараев.
Аммо соҳибкорони бозор мегӯянд, бо ин амал хадамоти оташнишонӣ супориши шаҳрдориро бобати таблиғи кор дар маркази савдои «Пойтахт-90» иҷро мекунад, вале савдогарону харидорон хоҳиши ба ин марказ рафтанро надошта, сабаби асосиаш номувофиқии макони ҷойгиршавии ин маркази савдо мебошад.
«Чанд сол пеш низ бозори «Шоҳмансур»-ро баста, изҳор дошта буданд, ки дар ин ҷо бояд танҳо маҳсулоти кишоварзӣ фурӯхта шавад. Фурӯшгоҳҳои моро баста, лекин баъди чанд моҳ ба мо пешниҳод карданд, ки савдоро дар бозори худамон барқарор кунем», – иброз дошт як савдогарзани сарулибос.
Қобили зикр аст, ки моҳи апрели соли гузашта бо мақсади пешгирӣ аз савдои кӯчагӣ ва роҳ надодан ба танбашавии нақлиёт дар мавзеи назди бозори «Шоҳмансур», нуқтаҳои фурӯш баста шуда, баъди чанде савдогарон боз ба ҷойҳои худ баргаштанд.
