Аз рӯи далели авбошӣ ва вайрон намудани тартиботи ҷамъиятӣ бо иштироки толибилмони мактаби таҳсилоти умумии №53-и шаҳри Душанбе, ки ҳафтаи гузашта рух дода буд, мутобиқи моддаи 237, қ. 3 (Авбошӣ бо истифодаи яроқ ё предмети ба сифати яроқ истифодашаванда)-и Кодекси ҷиноии ҶТ парвандаи ҷиноӣ боз шуд.
Сухангӯи ВКД Тоҷикистон Умарҷони Эмомалӣ ба «Азия-Плюс» дар ин робита изҳор намуд, ки ба тафтиши ин ҳодиса Вазорати корҳои дохилӣ машғул аст.
Ёдрас мекунем, ки ҳафтаи гузашта кормандони милитсия 4 нафар ноболиғони 16-17-сола, хонандагони синфи 11-уми яке аз муассисаҳои таҳсилоти умумии пойтахтро ба гумони авбошӣ ва вайрон намудани тартиботи ҷамъиятӣ дастгир намуданд.
Онҳо дар дохили мактаби миёна аз ҳиссиёти авбошӣ тартиботи ҷамъиятиро дағалона вайрон намуда, ҳамдигарро лату кӯб мекунанд ва яке аз онҳо бо корди дасташ 2 маротиба ба пойи хонандаи дигар задааст, ки дар натиҷа ҷабрдида ҷароҳати ҷисмонӣ бардошта, дар беморхона бистарӣ шуд.
Сардори Раёсати маорифи шаҳри Душанбе Ҳамидуллохон Фақеров ба «Азия-Плюс» дар мавриди ин масъала изҳор намуд, ки муноқишаву занозанӣ пас аз он сар задааст, ки яке аз иштирокчиёни он чунин шуморидааст, ки ҷабрдида «ба ӯ безеб нигоҳ кардааст».
Ҳодисаҳои ба ин монанд тайи соли охир бори аввал нестанд. Аввали моҳи июн кормандони милиса 7 нафар хонандагони яке аз мактабҳои таҳсилоти умумии шаҳри Душанберо барои ташкили занозании оммавӣ боздошт намуданд. Гумонбаршудагон тартиботи ҷамъиятиро дағалона вайрон намуда, якдигарро лату кӯб намудаанд, ки дар натиҷа чор нафари онҳо ҷароҳати ҷисмонӣ бардошта, дар беморхона бистарӣ гаштаанд.
Охири моҳи май низ ду нафар донишҷӯён – сокини 21-солаи шаҳри Ваҳдат ва сокини 19-солаи шаҳри Душанбе ба гумони содир намудани ҷинояти авбошӣ дастгир шуда буданд. Онҳо дар назди яке аз муассисаҳои таҳсилоти миёнаи умумии ноҳияи Рӯдакӣ бо 4 нафар хонандагони синфҳои 10 ва 11-уми мактаби мазкур аз ҳиссиёти авбошӣ ҷангу ҷанҷол карда, хонандагонро зери лату кӯб қарор дода буданд.
Раиси шаҳри Душанбе Маҳмадсаид Убайдуллоев чандин маротиба аз ин ҳодисаҳо нигаронӣ изҳор намуда, дар яке аз машваратҳои моҳи июн зикр кард, ки муноқишаҳои оммавӣ дар мактаб натиҷаи муносибати хунукназаронаи нозирони минтақавии милитсия ва кормандони соҳаи маорифи пойтахт ба вазифаҳои худ аст.
Маҳмадсаид Убайдуллоев қайд карда буд, ки дар сурати такрор шудани чунин ҳодисаҳо, нисбати шахсони масъул ва волидони хонандагон мутобиқи қонунгузории кишвар чораҳои қатъӣ андешида мешаванд.
