Кормандони милитсия сокини 27-солаи ноҳияи Бобоҷон Ғафурови вилояти Суғдро барои қаллобӣ дар ҳаҷми ниҳоят зиёд боздошт намуданд.
Бино ба маълумоти дафтари матбуоти ВКД Тоҷикистон, моҳи марти соли 2016 ӯ ба боварии марди 45-солаи сокини шаҳри Хуҷанд даромада, аз ӯ 21 ҳазор доллари амрикоӣ мегирад, вале маблағро то ҳол барнагардондааст.
Гуфта мешавад, гумонбаршуда бо ҳамин роҳ аз марди 26-солаи сокини шаҳри Хуҷанд 350-тонна гандумро ба маблағи 93 ҳазор доллари амрикоӣ гирифта то ҳанӯз барнагардонидааст.
Зикр мегардад, ки номбурда бо чунин кирдор аз марди 55-солаи сокини ноҳияи Б.Ғафуров низ 1100-тонна гандум, ба маблағи 203 ҳазор доллари амрикоӣ гирифта, аз ин 86 ҳазор доллари амрикоиашро баргардонида, боқимонда 117 ҳазор доллари амрикоиро то ҳол барнагардонидааст.
Бино ба маълумоти Агентии омори назди президенти ҶТ, соли 2015 дар Тоҷикистон 3 ҳазору 511 далелҳои қаллобӣ ба қайд гирифта шудааст, ки нисбат ба соли 2014 ба миқдори 123% зиёдтар аст.
