Вазъи молии аҳолии Тоҷикистон тадриҷан рӯ ба беҳбудӣ меорад. Дар муқоиса бо ҳамин давраи соли гузашта соли гузашта давоми моҳҳои май-августи соли равон музди меҳнат дар ҷумҳурӣ 18% ва нишондиҳандаи миёнаи ҳаҷми интиқоли маблағҳои пулӣ 5% афзудааст.
Бино ба натиҷаҳои таҳқиқоти Бонки ҷаҳонӣ таҳти унвони «Гӯш додан ба Тоҷикистон», афзоиш дар ин давра нисбат ба соли гузашта ба болоравиии музди меҳнат (18,1%) ва даромади бештар зиёд ба ҳар як сари аҳолӣ аз фаъолият дар бахши кишоварзӣ ва шуғли мустақилона (5,3%) ба вуҷуд омадааст.
Гуфта мешавад, боз яке аз сарчашмаҳои муҳими даромад барои хонаводаҳои Тоҷикистон, ки бар асари поинравии рушди иқтисоди Русия, беқурбшавии рубл ва шадидтар шудани қонунгузории муҳоҷирати ин кишвар боиси нигаронӣ шудааст, интиқоли маблағҳои пулӣ аст, ки нишондиҳандаи миёнаи он тақрибан 5,5% афзудааст.
«Аммо афзоиши ҳаҷми даромадҳо аз интиқоли маблағҳои пулӣ нобаробар аст. Тӯли моҳҳои май-августи соли 2016 даромад аз интиқоли маблағҳои пулӣ ба хонаводаҳое, ки тибқи тақсимоти истеъмол ба 40%-и аҳолии нисбатан камтар таъминшуда мансубанд, тақрибан 9% кам шуд. Дар ҳамин ҳол, ба хонаводаҳое, ки ба гурӯҳи 60%-и аҳолии бештар таъминшуда дохил мешаванд, интиқоли маблағҳои пулӣ дар ин давра 16,3% афзуд», – қайд мешавад дар таҳқиқот.
Тибқи маълумоти расмӣ, нисбат ба ҳамин давраи соли гузашта нимсолаи аввали соли ҷорӣ ҳаҷми интиқоли маблағҳои пулӣ дар ифодаи доллар 22% камтар шудааст. «Вале агар интиқоли маблағҳои пулӣ бо ифодаи воқеӣ бо сомонӣ ифода шавад, пас нимсолаи авали соли 2016 ҳаҷми интиқоли маблағҳои пулӣ оҳиста-оҳиста ба нишондиҳандаҳои пешин баргаштанд (афзоиш ҳудуди 2,4% дар муқоиса бо ҳамин давраи соли гузашта)», – таъкид меосзанд коршиносони Бонки ҷаҳонӣ.
Дар доираи таҳқиқоти «Гӯш додан ба Тоҷикистон» ҳамчунин маълумот дар бораи бозгашти муҳоҷирон ба Тоҷикистон низ пайгирӣ мешавад. Ҳамин тариқ, дар муқоиса бо соли гузашта ҳиссаи чунин муҳоҷирон начандон зиёд коҳиш ёфтааст: аз 1,9% дар моҳҳои май-августи соли 2015 то 1,6% дар моҳҳои май-августи соли равон.
