Ҳайати парлумонии Тоҷикистон таҳти раёсати Раиси Маҷлиси намояндагон Шукурҷон Зуҳуров субҳи 22 ноябри соли ҷорӣ ба шаҳри Санкт-Петербурги Федератсияи Русия сафар мекунанд.
Тибқи иттилои котиби матбуотии Маҷлиси намояндагон Муҳамадато Султонов ба ҳайати расмии парлумонии Тоҷикистон аз муовини Раиси Маҷлиси намояндагон Акрамшо Фелалиев, раисони кумитаҳои Маҷлиси намояндагон Лутфия Раҷабова, Абдураҳим Холиқзода, Эмомалӣ Насриддинзода, Рустам Латифзода, Олимҷон Салимзода, вакилони мардумӣ Мирзодавлат Сабуров ва Ҷамшед Саидов, узви Маҷлиси Миллӣ Фарҳод Раҳимзода, Юсуф Имомзода ва Наргис Раҳмонзода шомиланд.
Ба иттилои манбаъ, онҳо аз рӯзи 22 то 26 уми ноябри соли ҷорӣ, дар кори комиссияҳои доимии Ассамблеяи Байнипарлумонии давлатҳои узви Иттиҳоди Давлатҳои Мустақил, ҷаласаи Шӯрои Ассамблеяи Байнипарлумонии Созмони Аҳдномаи Амнияти Дастаҷамъӣ, ҷаласаи нуҳуми пленарии Ассамблеяи Байнипарлумонии Созмони Аҳдномаи Амнияти Дастаҷамъӣ ва ҷаласаи 45-уми пленарии Ассамблеяи Байнипарлумонии давлатҳои узви Иттиҳоди Давлатҳои Мустақил иштирок ва суханронӣ менамоянд.
Зикр гардид, ки дар шаҳри Санкт-Петербург Шукурҷон Зуҳуров бо раиси тозаинтихоби Думаи давлатии Русия Вячеслав Володин дидору гуфтушунид карда, дар вохӯрӣ масъалахои таҳкими робитаҳои байнипарлумонии кишварҳо баррасӣ хоҳад шуд. Ҳамчунин мулоқоти Шукурҷон Зуҳуров бо ҳайати воломақоми парлумонии Молдова низ дар назар аст.
Қобили зикр аст, ки аввали моҳи октябр вакил аз ҳизби «Русия воҳид» (Единая Россия), собиқ муовини роҳбари маъмурияти президенти Русия Вячеслав Володин раиси нави Думаи давлатии Русия даъвати ҳафтум интихоб шуда, ба ҷонибдории ӯ 404 вакил овоз дода буданд. Ҳарифаш аз Ҳизби коммунисти Русия Дмитрий Новиков ҳамагӣ 40 овоз касб карда буд.
