Барои ҳамаи довталабони Тоҷикистон, ки хоҳиши таҳсил дар мактабҳои олиро доранд, сарфи назар аз забони таълим дар мактаби таҳсилоти умумӣ, навиштани эссе – иншои мухтасар бо забони тоҷикӣ ҳатмӣ мешавад.
Дар Маркази миллии тестӣ чанд рӯз қабл барои 1015 нафар хонандагони синфҳои 11-и 28 мактаби озмоишӣ (пилотӣ)- шаҳри Душанбе аз навиштани иншои мухтасар санҷиш гузаронида шуд. Онҳо бо забони тоҷикӣ дар мавзӯъҳои иҷтимоиву таърихӣ ва фарҳангӣ бо забони тоҷикӣ иншо навиштанд. Натиҷаҳои он алҳол маълум нест.
Ёдрас мекунем, ки пешниҳоди навиштани иншо барои довталабон моҳи сентябри соли 2015 дар Донишгоҳи давлатии Кӯлоб аз ҷониби Президенти Тоҷикистон Эмомалӣ Раҳмон садо дода буд.
Сардори шуъбаи таҳияи маводи имтиҳонотии Маркази миллии тестӣ Ҷамшед Азимов ба «Азия-Плюс» дар ин робита иттилоъ дод, ки ҳадаф аз ҷорӣ шудани навгонии мазкур баланд бардоштани мақоми забони тоҷикӣ аст, то ки ҳар як шаҳрванди Тоҷикистон бо забони давлатӣ хуб ҳарф зада, андешаашро бо ин забон баён карда тавонад.
Ба гуфтаи ӯ, барои санҷиши иншоҳои хонандагон дар доираи ин чорабинии озмоишӣ беш аз 700 нафар мутахассисон – омӯзгорони забону адабиёти тоҷик ҷалб карда мешаванд.
«Ба толибилмон мавзӯи мушаххаси иншо пешниҳод намегардад, онҳо метавонанд дар ҳама гуна мавзӯи озод мухтасар иншо нависанд. Муҳимаш он аст, ки онҳо андешаи худро хаттӣ баён карда тавонанд. Эссе бояд аз 250-300 калима ва масъалагузорӣ иборат буда, муаалиф дар он бояд мавқеи худро дошта бошад ва дар иншо аз асарҳои бадеӣ ё ҳаёти рӯзмарра мисолҳо оварда шуда, хулосаи ҷолиби таваҷҷуҳ бароварда шавад», – гуфт Азимов.
