Дар робита ба мавриди истифода қарор додани навбати дуюми Маркази барқу гармидиҳии Душанбе-2 реҷаи маҳдуди истифодаи барқ (лимит) дар Тоҷикистон сабуктар шуд.
Бино ба маълумоти АМИТ «Ховар» бо такя ба маркази матбуоти ШСХК «Барқи тоҷик», мутобиқи дастури Пешвои миллат Эмомалӣ Раҳмон таъминоти барқ барои он минтақаҳои кишвар, ки дар доираи маҳдудият барқ мегиранд, ба миқдори се соат зиёд шуда, акнун минтақаҳо пагоҳӣ аз соати 05-00 то 10-00 ва бегоҳӣ аз соати 17-00 то 22-00 барқ мегиранд.
Қобили зикр аст, ки санаи 8 декабр Бо иштироки Президенти Тоҷикистон Эмомалӣ Раҳмон Маркази барқу гармидиҳии Душанбе-2 пурра мавриди баҳрабардорӣ қарор гирифт. Хишти аввали сохтмони навбати дуюми маркази барқу гармидиҳӣ (ИБГ) бо иқтидори 300 мегават аз тарафи Эмомалӣ Раҳмон ва Раиси Ҷумҳурии Мардумии Чин Си Ҷинпин моҳи сентябри соли 2014 гузошта шуда буд.
Тавре дар суханронии Сардори давлат дар ин маросим зикр гардид: «Дар натиҷаи ба кор оғоз намудани навбати дуюми Маркази барқу гармидиҳии «Душанбе 2» имкон пайдо мегардад, ки дар як шабонарӯз 7,2 миллион киловатт/соат неруи барқ истеҳсол карда шавад»
